Хүрээмарал сумынхаа нийт зон олны ураг удмын түүхийг цахим хувилбараар бүтээж, тасралтгүй баяжуулан хойчийн үр хүүхдүүддээ уламжлуулан хүргэх зорилгоор цахим хуудсаар нийтэд зарлаж, материал хүлээн авч эхэлсэн билээ. Цахим ном маань материал ирүүлсэн цөөн хүмүүсийн удмын түүхээр эхлэн гарч байгаа хэдий ч цаашид олон олон хүний түүх намтраар баяжин зузаарна гэдэгт итгэлтэй байна. Ийм ч учраас khureemaral.com сайтаар дамжуулан номд материалаа ирүүлэх боломжийг бүрдүүлж өглөө. Та бүхнийг Microsoft Word файлаар материалаа бэлтгэн үг үсэг, найруулга зүйн алдаагаа сайтар хянаж, засварлан холбогдох зураг сэлтийн хамт “Санал хүсэлт” хэсэг рүү орж илгээхийг хүсье. Фото зураг сонгохдоо аль болох чанар, нягтрал сайтай зураг сонгохоос гадна хуучин зургийг сэргээн засварлаж оруулбал хожим хэрэгтэйн дээр уншигч олондоо ч хүндэтгэлтэй хэрэг болох биз ээ.